قصيدة لبابـة نظم الحاج أحمد سهوم

Admin المساهمات : 191 تاريخ التسجيل : 16/05/2022

قصيدة لبابـة نظم الحاج أحمد سهوم

الحربة :
جينا لعندك ناويين نلقاو هنا لحباب .
هما صدو و بيوتنا تهدو بابا يا بابا .
واش هاد المكتوب .
...............
جينا امْع اللِّيل اوْ كان اسفَرْنا اصْعيبْ
رَحْنا امْوَهْنِينْ امْنَ التَّعْبْ
مْسَهْسْهينْ دَزْنا فَالدَّربْ
حَتَّى الْدارْ رَاجْعَتْ اخْربْ
وَاخْزينْها الـتَّنْهبْ
والشِّيخْ اجْدَبْ
كايْحَبْحَبْ
وَادْهَشْنا كُلّنا.. افْـزَعْنا..وَانْطَقْنا كَامْلينْ قُلْنا: بابا يا بابا
واشْ هَذْ الْمكْتوبْ ؟
جينا لَــــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْـهَدُّوا بابا يابابا
واشْ هَذْ المكتوبْ
صَبْناهْ بُوحْدُه في ذاكْ اللِّيلْ ارّْهيبْ
الشّمَعْ كانْ شاعَلْ وَاهْبا
وَابْقى الشِّيخْ عنْدْ الْعَتْبَة
فَاسَالاَّسْ كَا يَتْخَبَّا
وَامْشينا الْقُبَّة
كانَتْ قُبَّة
مْسَاتْ خَرْ بَة
وَانْطَقْتْ اوْ قُلْتْ منْ الْقَهْرَاُومَنْ لَغْبِينَة الْغَابْنَني: بابا يابابا
واشْ هَذْ الْمَكْتوبْ
جينا لَـعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْـهَدُّوا بابا يابابا
واشْ هَذْ المكتوبْ
بَتْنا امْعاهْ فَ: الدَّارْ اوْ بَاقا كَا تْريبْ
سَقْطَتْ سَارْيا عَنْ غاربْ
وَالسُّورْ باتْ كَا يَتْرايَبْ
والطُّوبْ كَ ايْسَرْسَرْ حَاصَبْ
اوْطالتْ الغْيا هَبْ
اُو لَمْتاعَبْ
وَ الْمْشَاغَبْ
وَ الشّيْخْ آكرْحْتُه اتْوَهَّنْ مَا جَاوَبْنَا امْنينْ قُلْنا: بابا يابابا
واشْ هذْ المكتوبْ
جينا لَعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْنا اتْهَدُّوا بابا يابابا
واشْ هَذْ المكتوبْ
مَنْ مَاتْ مَنْ الْعَصَرْ مَا يَدِّي ما ايْجيبْ
مَنْ لِيلْتْ الْـغْبَنْ لَكْهيبَة
حَياتْ ما اعْليها هيـبَة
وَابْدونْ طَعْمْ وَابْلا طيبة
عُنْوَانْها الْـخَـيْبَة
والتَّغْرِبَة
اوْ كُلْ عَـيْبَة
وَنالازَلْتْ تَـنْصَقْصي وَانْسالْ الشَّـيْخْ كُلّْ سَاعة: بابا يا بابا
واشْ هذْ المَكْتوبْ
جينا لَــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْـهَدُّوا بابا يابابا
واشْ هَذْ المكتوبْ
مَا صَبْتْ مَنْ انْسالْ : امْنايَنْ هذْ الْخْرِيبْ
لاَحْبابْ هَلّْ الْمَنْزَلْ غَابُوا
وَالْحيّْ كُلّها وَامْصابُه
وَ الشَّيْخْ مَا اسْمَعْتْ اجْوابُه
مَا قَالْ لاَ امْصَابُه
لاَ مَنْ صَبُه
وْكيفْ رابُوا
سايَرْ لَقْوَاسْ ...وَارّْتاجَاتْ ...او سّوارِي اوْ كيفْ كانوا:بابا يابابا
واشْ هَذْ المكْتوبْ
جينا لَـعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْـهَدُّوا بابا يابابا
واشْ هَذْ المكتوبْ
صَمْتْ الدّْجَى ا تْفَتَّتْ وَ اتْشَـتَّتْ بَ: انّحيبْ
يا شُومْ لِـيعْتي ادّْروبَة
ظَنِّيتْ كُلّهَا مَخْروبَة
وَبْحَالْ دَارْنا مَـنكوبة
هَذْ الْقْضَا اعْجُوبة
طاحْ ابْنوبة
بْلا رْطوبة
وَ اهْنا يَا فينْ شِيخْ لَكْلامْ ارْفَعْ صَوْتُه اوْ قالْ: يا مَعْشَرْ الْأُ دَابا
تَـيَّهْـنا مَلْعُوبْ
جَاوْ اشْـقارة لَهْنا اوْ فَرْحْنا قُمْنا لَلـتَّرْحَابْ
قَالُوا مُكْتَشِفينْ كُلّهُمْ اوْ قالوا نَـقَّابة.
تركوني مَسْلوبْ
قالوا رَحَّالة جَايْلينْ قَالوا سُـيَّاحْ الْبابْ
قَلوا بَحَّاثَة بَرّْ وَ الْبْحَرْ وَ الصَّحْرى وَ الْغَابة.
بَالْعَلْمْ الْمَطْلوب
اُو اتْمَسْكْـنُوا حتَّى اتْمَكْـنُوا وَابْدا لاَسْـتِلاَبْ
سَحْرُونا..جَلْبُونا.. اوْ جَيْحونا كانُوا غَلاّ َبة .
مَا رَحْمُوا مَغْـلوبْ
وَاشْهَقْ شَـهْقَاتْ امْلاَحْـقَـاتْ ما بيـنْ الْفَاظْ اغْرابْ
ابْلا سِيَّاقْ امْـشَتْـتِينْ ظَـنِّـتُـه قالْ ا ذْيابَة.
وَ الْفَخّْ الْمَنْصُوبْ
قَالْ "الْعْلُومْ" اوْ قالْ " تِـقْـنِيَّا تْ " وْ " سَطْرْلاَّبْ "
قالْ"الْمَعْرفَة"قالْ" فِكْرْ اُو نَقْدْ" اوْ قالْ اكْتابة .
وَاذْكَرْ كَلْمَتْ"حُبّْ"
قالْ"الـثَّقَافة " قال ْ " فَنّ ْ" قَالْ "الشِّعْرْ اوْ أَدَبْ"
وَ ارْتاحْ مْنَ الشَّـهْقَة اوْ صارْ صَوْتُه نَغْمة مَـنْسَابة قالْ:اعْجَبْ لَعْجوبْ
صَاغونا كيفْ ابْغاونا ايْشَرَّدْنا لَغْـتِرابْ
كانْ الْيَحْباطْ اوْ كَا نْتْ ارّْزِيَّاتْ اوْ كانْ الوابا.
وَانْـهَالُوا لَكْروبْ
وَاعْتا نَـقْنا مَا جَاوْا بِـهْ لـِنا دُونْ اسْـتِـيعابْ
تَمَّاكْ اخْرَجْنا مَنّـنَا الْفِـينْ انْعيشُوا غُـرَابَة .
نَجْـرِيوْا لَـلْغُروبْ
وَ الْهَوِيَّة بَـدْوَايْرْ ادّْوَايَـرْ صَـبْحَتْ سَرابْ
اُولاَ نْتِماءْ اهْشا شْ وَانّسَابْ قْوالْ الـنَّسَّابة.
فَ:اتْراجَـمْ لَكْتُوبْ
آلِينْ آوِينَا بَاقْـيينْ سِيـسَانْ اصْحاحْ اصْلاَبْ
رَجْعُوا لَلدَّارْ اوْ شَمّرُوا لَّلـبْـنِي شَرْعُوا مَنْ دَابْة.
مَا يَنْـفَعْ لَهْروبْ
أَلَخُّوتْ آلاَحْبَابْ يَاهلَ الْـغِـيرة يَا لاَصْحابْ
لَلَّهْ الْحَدْ اتْلاَمُّوا اوْ وَلِّـيوْا الْدَارْ اعْرَابة.
فِي قَـلْعَةْ يَعْرُوبْ
جـَا وَ قْتْ الْجَدّْ آهَلْ الْجِـدِّيَّة تَرْ كُـوا لَعْتا بْ
وَاسْتَاعَدُّوا لَلْجَدّْ لاَ اتْقُولُوا :.....بابايا بابا.
واشْ هَـذْ الْمَكْتوبْ
جينا لَــــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْــــهَدُّوا بابا يابابا.
واشْ هَذْ المكتوبْ
مَنْ شَافْ كيفْ كَانَتْ دَارْ الشَّيْخْ انّجيبْ
اسْقُفْهَا " الحُرْ " فْ لَخْشَبْ
وَانْقِيشْ وَ اتْخَارَمْ تَخْلَبْ
وَارْخامْ فَالْحْنوكْ أو لَعْتَبْ
وَالشيخْ كانْ لَمْكَبّْ
اوْ تَيَرْكَبْ
كُلّْ مَرْكَبْ
بَاشْ ايْخَلِّي الدَّارْ تَبْقَى فُ:اوْقَرْها لاَ للِّي ايْنادي بابايا بابا
واشْ هذْ المكتوبْ
جينا لَــــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْــــهَدُّوا بابا يابابا
واشْ هَذْ المكتوبْ
اجْداوْلْ الْمْياهْ تْنَهْمَرْ مَاها اسْكيبْ
تَرْوي اعْرَايْسْ الْمْحَبَّة
تَسْقي ابْدُورْ حَبَّة حبَّة
وَالْـأَ رْضْ فَ:الْـعْراصي خَصْبة
دَغْيا اتْبانْ نُخْبة
مَنْ زَهْرْ انْبا
اكْسى الرُّبى
وَانْعَمْلُوا مَنّهَا امْشامَمْ وَلاَ نَبْقَاوْا كَا نْعِيدُوا بابايابابا
واشْ هذْ المكتوبْ
جينا لَــــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْــــهَدُّوا بابا يابابا
واشْ هَذْ المكتوبْ
كانْ ارّْياضْ فيهْ السَّمْريسْ اوْ عَنْدْليبْ
كَالاَنْيُوسْ فَارَحْ طَا رَبْ
وِيجِـيبْ فَ: نّغامْ اغْرايَبْ
وَالبُوحْ عَلّْ الْبُوحْ امْوَاضَبْ
وَانْزَايْهْ الْحْبا يَبْ
لاَ مَنْ غَا يَبْ
وَالْمْطَا يَبْ
سُبْحَانْ اللَّهْ كي اصْبَحْنا كيفْ امْسينا اوْ لاَ مْنَ لْغَى بابايابابا
واش هذْ المَكتوب
جينا لَــــعَنْدَكْ ناوْيِينْ نَلْقاوْ اهْنا لاَحْبابْ
هُمَا صَدُّوا وَ ابْـيُوتْـنا اتْــــهَدُّوا بابا يابابا
واشْ هَذْ المكتوبْ
لَموَذّْنينْ جَهْروا بَالْأَذَانْ الْحْبِـيبْ
باقي الْخيرْ رَغْمْ السِّيبَة
وَالإسْلاَمْ كُلُّه هِـيبَة
تَسْهالْ بِهْ كُلّْ اصْعيبَة
نَتْفَكّرُوا الصِّبى
وَالتَّجْريبَة
للِّي اقْرِ يبَة
قَبْلْ الْمَنْفَى اوْفِي ايَّامُه كُنَّا مَنْضَاوْيِينْ تَحْتْ اعْلامْ الْمَغْرابَة
ما فينا مَرْعُوبْ
وَ اصْبَحْ فَ: الدَّارْ اصْباحْنا ارْمَادِي غَالَقْ مَكْها ب
كَانْ اصْباحْ ابْلاَ شَمْسْ كَا نْ ضَيْمْ اوْ كانتْ كَأَبة .
وَامَا مَنْ لَكْرُوبْ
وَاتْشَاوَفْنا بَعْدَ اوْعَرْفْنا ...وَ الْبَاقي يَـرْ أَبْ
نَرْجاوْ اللَّهْ ايْجُـودْ بَ: سْحُو مَـا تَبْقى ضّـبَابَة .
خَمْجَة عَللّْ لَـقْلُوبْ
ما نَعْرَفْ لاَشْ اوْ باشْ جَاتْني " سالمْ حَلّْ الْبابْ"
قَفْزَاتْ الْـدهْني هَكْذَاكْ ...! بَالـسُّؤَالْ اُو لاِجـابَة وَالْحَاجَبْ مَقْـطُوبْ
خَرَّجْ كَفَّارَة سَـالَمْ اُدْعَنْ بَـاشْ حَلْ الْبَابْ
مَافـَاقْ ابْعَـيْبُه غيرْ مَنْ اسْـتَيْقَظْ قَالَتْ لـُبَابة .
لَلـنَّهْضَة مَطْلُوبْ
وَاسْـلاَمي لَلِّي عَارْفينْ هَذْ الْـوَ اقَعْ سَلاَّ بْ
وَابْغَاوْا خْـلاَصْ ايْغَيْرُوهْ هَلْ لاَ فْكارْ الْوَ تَّابَة .
وِايْصَلْحُوا لَعْـيُـوبْ
اللَّهْ ايْكونْ فْ: عَوْنْ نَاسْ لـَفْضلْ شيبْ اوْشْبابْ
حَتَّى يَبْنِيوْا الـدَّارْ بَاصّفى وَ اتْكُونْ اسْـتِجَابة.
لَلْعِـلْمْ الْمَوْهُوبْ
وَالْأَسَمْ مَايَخْفى امْـوَخْـرُه لَنْهَا يـَتْ لُخْطابْ
أَحْمَدْ سُهُو مْ ابْكُرْحْـتُه ايْنادِي بابا يَا بابا .
وَشْ هَــذْ الْمَكْتُوبْ