قصيدة مريم نظم: عبد المالك بن عمر الفيلالي رحمه الله؛

Admin المساهمات : 191 تاريخ التسجيل : 16/05/2022

قصيدة مريم
نظم: عبد المالك بن عمر الفيلالي رحمه الله

الحربة
مااسباني ودا عقلي غير بوسالف مريم
عارمي ضي اهلال الدارة ليلت عشرا

قسم
ما يشالي فنهار الحرب غير من كان امكلظم
راكب على شلوي مدوب من اخيول الصحرا
ما ايعيط من غير اهواه بز منو يتكلم
غير من شعلت نار الحب في قلبو جمرا
ما ايغني فاالعود اخذايعو فاالوتار ايزكلم
غير مول النشوة سكران بااكيوس الخمرا
او صاحب ماية مول اكباح من راسو ينظم
تيهوه ابنات الغيوان فابساط الحضرا
قسم
هكذاك انايا وقت ماانشوف العوارم نعظم
باالشمع والساقي معلوم لابواب الصفرا
ماايخربوا ديوان العاشقين الا العوارم
كيف سلبت عقلي بنجالها ذيك السمرا
رحت كاوي كية شلا انطيق فاضميري نكتم
سبت اهلاكي يوم اخرجت ولقيت الزهرا
خارجة كيف ايجي ملك بين الجيوش امكلظم
تابعينه باشات وقياد وخلفان ووزرا
قسم
امنين شافت فييا ابقيت غير مبهوظ انخمم
مااسمعت غير انقير الخلخال وادباج وفجرا
اش هذاك على خذك كان هو ورد امبسم
او جلينار اشعلتيه في خذك يورا
جاوبيني باالجد اعلاش تايهة ما تتكلم
دايرة عني مايعتاد ياك في كم من مرا
واش ما شفك حالي هذا اشحال ونا ندمم
اش نعمل واش المعمول مابيدي قدرا
قسم
عيدلي واش انت بعدا افقيه من فاس امرسم
او طالب براني سير للجامع تقرا
ما تعرف الحكام اوراك جاي ياولد الزهطم
اش جابك لبنات الناس لوما ذاالحكرا
قلت ليها مانعرف في ابلادكم واين نزطم
غير وعد الله لاقاني بيك يا اكحلت الظفرا
اش را من لا يتسلا امعاك فارياض امنعم
في اجنانات وامياه تجري واغصان وخضرا
قلت ليك سير افحالك لا اتعود فخطابي تندم
صاحب الخفة راه ايطيح في مول البقرا
اما انا بسلامة راجلي وناسي ابن العم
غير تايك منهم يلقى من اقرانك عشرا
قسم
يااترى كان يسعدني الزمان بوصولك ننعم
كل ما قلتي لي نعطيه في حل البشرا
ابغيت من الله. منك اتجود باالسماحة واتكرم
لا اتبوح باسري خليه يبقى فاالسترا
بعد من ذاك اتعاهدنا وجات عندي للمرسم
اكمل قصدي واحيا قلبي بوجود الزهرا
خوذ ياراوي راني جبت ليك ياقوت امنظم
صول بيه وغنيه قدام الاشياخ الكبرا
خوذ مني ميات من اكباح من شغل امعلم
ماايسيغ امتلهم الا المصمودي بحرا
واسلامي هبتو للماهرين والفاهم يفهم
قال الفصيح بن عمر طايع ارباب الشعرا
لا ايهموك القوم الجاحدين خليهم فاالهم
فاش جاوك لو كان ايجيوا بحمالت كترا.