Admin
Admin
المساهمات : 191
تاريخ التسجيل : 16/05/2022
 | | موضوع: قصيدة الزردة نظم الشيخ توفيق أبرام الأحد مايو 22, 2022 5:37 pm | |
| قصيدة الزردة نظم الشيخ توفيق أبرام
قياس دام الله الحسن
طالب ضيف الرحمان..ياجاري جود علي
وجد لي زردة مبرعة دايزها لكلام
لا تخبر شي غشما
ق1
دير معايا لحسان..يا جاري فكر فيا
وكرمني لله ياك لبخل فالدين حرام
لا تجحد فالنعمة
لانك جيد مزيان..ياسيدي كبر بيا
وسخى باللي جاد بيه ربي ورحم ترحام
والجودية رحمة
قالوها ناس زمان..ناس النخوة والنية
لا تبخل بطعام والسخاوة شيمة لكرام
قيم عراضة فخمة
واللي يبخل مشيان..عايش فالميزيرية
مهما حاز موال طايلة فحياتو يعدام
بين اصحابو نقمة
طالب ضيف الرحمان يا جاري جود عليا
وجدلي زردة مبرعة دايزها لكلام
لا تخبر شي غشما
ق2
جوعي قاسي وشديد.. والمعيدة مشدودة
نتسنى يوم سعيد..والشهوات المنشودة
نملا كرشي ونزيد..كمية لامحدودة
دخلني للميدان..سد البيبان عليا
ما نرضى بشريك فالميادي والا بزحام
فالطرح ادا يحمى
لا تعلم شي خصمان..قفالين الشهية
حتى باسم الله ما يذكروها قبل طعام
ما حمدوا فالختمة
كتعرفني قرصان..مانخطا عباسية
صمصامي بتار فالولايم واللي نمام
ما يغنم شي لقمة
ادا جاو العديان..ما تغلبني لحمية
ما نترك جلدة لكل ناقم غرضو لخصام
يلقاني فالهجمة
ويلا حان العضان..والفتك بدون روية
ما نغفل عن قوت ما نشاهد غير القدام
ونباشر فالخدمة
طالب ضيف الرحمان يا جاري جود عليا
وجدلي زردة مبرعة دايزها لكلام
لا تخبر شي غشما
ق3
عجل بخروف سمين..من لخراف المزيانة
مقسوم على نصفين..ترتاح معاه الكًانة
من بعدو شي طجين..بالقوق مع الجلبانة
عمرلي شي كيسان..وزلايف شبّارية
دالرايب ومعاه شي سمن حايل ولد العام
يعجبني فالنسمة
هات قنيات سمان...فالدغميرة مخفية
وكًريكًر وكذلك الزرازر ودكر ليمام
وفداوش للردمة
جيب طيور السمان..جيب فرارج بلدية
والحبشي وكذلك الحجل وشنابر لحمام
نمحيهم فدغمة
دوز لعند الفران ..جيب معاك الطنجية
وحدة بالكرعين زيد وحدة من غير ايدام
تنطق ليها بكمة...
طالب ضيف الرحمان..ياجاري جود علي
وجد لي زردة مبرعة دايزها لكلام
لا تخبر شي غشما
ق 4
جيب كسكسو يا جار..ويكون بسبع خضاري
نهجم كيف التتار..لو فيه جمل اعشاري
نمحي ليه الأتر..ويدوب فرمش بصاري
ادا كنتي فنان..لا تنسى لمروزية
تعرفني مولوع بالمعسل لاش التخمام
عمرلي شي برمة
خمسميا د القطبان..عل لمجامر مشوية
وجدلي كفتة مصهدة منسومة بقوام
غطيها بالشحمة
عشرين من الطيحان...عمرها بالشعرية
والبصلة والروز والزياتن من غير عضام
فوق صواني ضخمة
جيب اصناف الحيتان..والشابل من مهدية
لمرينة والصول والكًوال ناكل عرام
الكيلو فالدغمة
شي روطالات بنان..كتعجبني مقلية
الدرعي والقرب جيب غير جويجات توام
تعرفي بالحشمة
طالب ضيف الرحمان يا جاري جود عليا
وجدلي زردة مبرعة دايزها لكلام
لا تخبر شي غشما
ق5
وختمها بالديسير..جيب تفاكه وقتية
جيب التفاح كبير..عشرة كيلو وشوية
الصاين والعصير..واش بغات النفسية
الخوخ مع البنان..لافوكا والهندية
لا تنسى حب الملوك صفريوي ياسلام
فيه دوى للسقمة
جيب نكًاصات حنان..خمسة كيلو متنية
والليمون بلا عداد بيه ناكي لغشام
والطبالا فالما
الكرموص بالاطنان..كحلة والحمّيرية
جيب الشهدية وجيب شي رمانات اروام
لمهاية فالختمة
طالب ضيف الرحمان يا جاري جود عليا
وجدلي زردة مبرعة دايزها لكلام
لا تخبر شي غشما
ق6
ناكل من غير قياس..ونفتش عل لولايم
أش عليا فالناس..والا فعتاب اللايم
واللي يتبع لكًناس..يا ويحو يبقى صايم
مايخلعني ميزان..ما ترهبني كمية
ما نقبل ريجيم ما نخالف دعوة لطعام
ما تقهرني تخمة
الزردة يا لخوان..مهما بعدات عليا
نقصدها لو جات فالفيافي ومسيرة عام
اعزايا فللقمة
يا جار عليك امان ..غير البسط اللي بيا
ونضامي فرجة لكل منهو راوي لكلام
ليس خفاتو حكمة
خود ارقايق لوزان..فقصيدة فكاهية
فيها ما لذّ وطاب لينا صحة وسلام
بالكلمة والنغمة
اسمي واضح يعلان ..توفيق بغير خفية
سلواني عيار فاللغى والكنية أبرام
ذكرها بالفخمة
نرجا عفو المنان..يغفر ويسامح عليا
بالرافة والخير والرضى وفساعة الختام
يشملني بالرحمة | |
|
