Admin
Admin
المساهمات : 191
تاريخ التسجيل : 16/05/2022
 | | موضوع: قصيدة ( فارغ لجباح ) نظم الشيخ توفيق ابرام الإثنين مايو 23, 2022 2:19 pm | |
| قصيدة ( فارغ لجباح ) نظم الشيخ توفيق ابرام
فارغ لجباح جاب خردة والقافية بلا لحان
طالق بجهالتو عنان
ويقول بلا حيا لسيدو هاك الحلة الوازنة
ق1
فن الملحون يا الدّاعي هبة من خالق الكوان
يوهب من راد بلحسان
وانت موهوب فالسّعاية والزيغة والمشاحنة
مسخوط الوالدين غرّي محساد وناكر الحسان
راضع لغيار ولغنان
عايش فردي بلا رفاكًة جنيّة فيك ساكنة
ما سجّيتي ولا نشدتي جهلك بعد الخفا علان
راكب لهوى بلا فران
صبتي حنطة بلا حراسة فالظرفية الرّاهنة
لاصق فالفن كا كًرادة سكنت في تابع الحصان
تجمع فالرّوث والدّران
لا صنعة لا طبوع نلتي والسّاكن فيك ما هنا
حنطة وبلا كًياد سابت مكًواك تصول فالمكان
تشبه صرصار عاد بان
وصنادلنا عليك تهوى والمبيدات كاينة
ق2
فالحركة صالت الحمير... والخيل على رباطها
صربة كًوّادها قصير..زعرط ونسا كًيادها
والنّدهة كانّها شخير.. كيف الحلوف رادها
ما فرّق شِعر من شْعِيْر..والا لمعيز من مْها
زغتي يا شاعر المراحض وعلى لسياد كاتبان
يا شيخ تواخر الزّمان
لا تستعلى على المشايخ بالنّونية الماجنة
تدعي بالعرف والدراية وانت منبود فالرّكان
مالك عزوة ولا وطان
ضهرك مسلوخ بالمشاحط يا قرد فجامع الفنا
لوكان تجي صغير عندي نعطيك مفاتح البيان
تروى وتشوف بالعيان
الوان الشعر والبلاغة وتواشح من تراثنا
حالك موحول يا الحالك لعقل والقلب والبدان
وعقادك وازنة طنان
تغنيك على حوال غيرك يا وجه النحس قيلنا
جبحك ماليه بالدّناية راوي فسقاية الضّغان
مالك صدقا ولا خوان
لا صاحب لا شريك درتي ما وقرتي جوارنا
ق3
تنعـق وتصيح كالغراب.. يــرثي فبيـاد قاحــلة
تدعي بالحرب والخراب.. والحرقة فيك واحلة
داخل لوغى بلا حراب.. شدّاك لشي مقاتلة
تابــع لهتـوف والسـراب.. زايـغ بعقــود باطــلة
ما جالستي شيوخ ما غدرتي موهوب فالدنان
يا وجه الويل والمحان
لوكان تشوف فالمرايا ماتدخل فالمقـــارنة
قصّر لعنان يا الغرِّي وسمع لوصاية الرّزان
وصغى لقماهر المْدان
سلم للشّيخ لا تفرعن ويحقّ عليك زربنا
سرك منغاز يا الجاهل بسرار القول واللسان
وشواري واسقة اوزان
سبعين سنة على مخاضك والد جتّة معفّنة
خليك ملازم الحفاري غارق فالذل والهوان
وعليك عقاد باللّوان
داير مادارت النعامة فالأرض الرّاس دافنة
جبتي خرقة مرقّعة غير القافية بلا وزان
وتخيط بدون برشمان
شطرين كلامهم جبلي والتالت من سراغنة
ق4
داخلها غير بالصّياح.. تشبه قنجار فالغنا
خليك ملازم النّباح..ماليك مقام عندنا
لا طايل فيك لا صلاح..والا رجوة ولا منى
صرتي عنوان للقراح .. برّاح الشّوم والفنا
شيوخ الدّل والسّقاطة صارو يفتيو فالمدان
لامة لقرود والجّران
وقصايدهم كالبطاطا عمرت بيها سواقنا
سلم لضراغم السّجية تغنم لوقار والضمان
ترقى ويصير ليك شان
وقر لكبار يا الغرّي لا تدخل فالملاسنة
هدا بحر الكلام واعر خليك بعيد يا فلان
ما توصل رايس الدّمان
ما رمتي فالحروف بروة حدّك ميّاح عندنا
فعيوب الناس كتقلّب وعيوبك للعما تبان
هادوك خصايل الرّعان
ماوقرتي عليك عاتق والا حرمة محصّنة
من شافك خاركً الجّلالب حسبك من خيرة العيان
وانت مقطوع من غصان
ظاهر بمظاهر التقيّة والخدعة فيك باطنة
توفيق اسمي ويا السّايل عني معروف من زمان
نوفي لحسان بالحسان
وجوابي شوك للمساخط واللي دقّوا فبابنا
مانا سبّاق للمشاحط والا مغروم فالغنان
قولي زنجار للعيان
هذا لعراض يالناقص عرضو ويقيس عرضنا | |
|
