Admin
Admin
المساهمات : 191
تاريخ التسجيل : 16/05/2022
 | | موضوع: مْصْبَاحْ النِّيَامْ نظم الشيخ توفيق أبرام الخميس مايو 19, 2022 6:33 pm | |
| مْصْبَاحْ النِّيَامْ نظم الشيخ توفيق أبرام
الحربة
صْلِّيوْا عْلَى الْحْبِيبْ مْصْبَاحْ انْيَامِي
مُحْمّْدْ خَاتْمْ الرّْسَالْ
قسم 1
بْاسْمْ الله الكْرِيمْ نْبْدَا فْكْـلاَمِي
العالمْ مَاخْفَـاهْ حَالْ
الصّْلاَةْ عْلَى الرّْسُولْ وْكْدَاكْ سْلاَمِي
لحْبِيبْ اشْفَـاعْتُو نَّالْ
حْسْنُو فْالْكُونْ لِيـــسْ دْرْكُـو آدَامِــي
مْنْ جَابْ الدِّينْ بْالْكْمَالْ
سْلِيلْ الشُّرْفَا الطَّاهْرِينْ الْهَاشَمِي
مْعْصُومْ القُولْ وْالفْعَالْ
قسم 2
حُبّْكْ يَاغَايْةْ الْهْدَى ,, فِي قْلْبِي فَايْتْ المْدَى
شُوقِي لْمْقَامكْ السّْعِيدْ
جْمْعْ الكُفَّارْ وْالْعْدَا,, فْالْحِينْ ضْحَاتْ نَاكْـدَة
بْدْعْوْتْكْ غْمّْـهَا شْدِيدْ
اجْنُودْ الحْقّْ وْالفْدَى ,, جَادْتْ بْالرُّوحْ جَاهْدَة
صَالْتْ بْصْوَارْمْ الْحْدِيدْ
فْهْوَاكْ اتَاجْ الُورَى طْبّْ اسْقَـامِي
لْمْشرّْفْ سِيدْ الرّْجَالْ
سِيدْ الْكَوْنِين وْالثّْقْلِيـنْ اهْمَامِي
زِينْكْ مَاشَافْتُو انْجَال
اعْرْجْ بِيـكْ الْجْلِيلْ لْلــدُّرْج السَّامـي
يَابْدْرْ الْكُونْ فْالْكْمَالْ
انْتَ نُــورْ الهْدَى فْغِيهَـابْ ظْـلاَمِـي
دْبّْب حْمْلِي ادا ثْقَالْ
قسم 3
يَامُولْ الْجُـودْ وْالْوْفَا ,, اجْعْلْني رَايْمْ الصّْفـا
وْنْعْمْ لِي غِيـرْ بْالْكْفَافْ
انتَ الْعَالْمْ بْالخْفَى ,, عجّْلْ باللُّطْفْ والشّْفَـــا
يَاغُوثْ القُــومْ الضّْعَافْ
الْقْلُوبْ تْعُودْ رَايفَـة ,, تْمْــلاَ وْدْيَانْ شَاحْفَــة
وْيْزُولْ الظّْمَا مْعَ الْجْفَافْ
ثْبّْتْ يَا خَالْقِي عْلَى الْخِيــرْ قْـدَامِي
وْحْسْبْ لِي صَالْحْ الْعْمَالْ
شَايْقْ طِيبَة نْزُورْ وْيْطِيـــبْ مْقَــامِي
اونْغْنْــمْ كُــلّْ مَانْسَالْ
يْرْوَى جْسْمِي مْنْ النّْبْــعْ الزّْمْزَامِي
مْيَاهُو صَافِيَة زْلاَلْ
فْجْبْلْ عْرْفَة الشّْرِيفْ يْكْمْلْ اِيْحْرَامِي
مَالِيـهْ مْثِيـلْ فْالْجْبَالْ
قسم4
مْنّْكْ لاْنوَارْ شَارْقَــة ,, وْنْسامْ الطِيبْ عَابْقَة
امْدِيحْكْ زَادْنِي اشْوَاقْ
لْمْحْبَّة لِيـكْ سَابْقَة ,, لْجْوَارْحْ لِيكْ نَاطْقَة
يَازْهْوْ الْقْلْبْ وْالاحْذَاقْ
دْخِيلْ الدّْعْوَة الصَّادْقَة ,, مْنّْك نْشْرْبْ وْنْسْقَى
يُومْ الْمْـحْشْرْ وْالتّْلاَقْ
امْدِيحْكْ رَاحْتِي وْسْقْوَة لْعْظَامِي
يْشْفِي جْسْمِي مْنْ الْعْلاَلْ
اِسْمْ الْعْبْدْ الضّْعِيفْ بَايْـنْ فْخْتَامِي
تَوْفِيـقْ مْطْـرّْزْ الْقْـوَالْ
كْمّْلْت قْصِيدْتِي وْفْصّْلْـتْ اقْسَامِي
هَاكْ الحُلَّة عْلَى الْفْصَالْ
سُوّْلْ فْسْلاَ تْصِيبْ عُنْوَانْ ارْسَامِي
عْندْ الرّْحْبَة عْلَى الشّْمَالْ
نْمْدْحْ سيدْ الاْسْيَادْ بْرْقِيقْ انْضَامِي
حْبِيــبْ الله ذَا الجْـلاَلْ
وْكْدَاكْ الرَّاشْدِيـنْ لِيهُمْ سْلاَمِي
وْالْعْشْرَة لاَمْـةْ الفْضَالْ
مُولاَيَا غِيتْنِي مْنْ الصّـهْدْ الْحَامِي
سْرّْحْ لِي كَامْـلْ الْخْبَالْ | |
|
